(KukwaMbatha ntambama. Kukhona ongqongqoza ngasankahlu emnyango.)

THANDI: (Eqonde emnyango.) Ngubani lowo ongqongqozisa okohlanya? (Avule, abone ngendoda egqoke umfaniswano wamaphoyisa. Aphinde abone neveni yamaphoyisa ngalena kothango lomuzi. Abingelele.) Sawubona, ngingakusiza?

ZONDI: Yebo, ninjani ngane yami? (Angalindeli mpendulo.) Ngabe kukubo kaMzwakhe Mbatha lapha?

THANDI: Yebo, ikhona kubo kaMzwakhe Mbatha.

ZONDI: Wena ungowakhona lapha ekhaya? Bakhona abadala?

THANDI: Yebo, ngingowakhona. Umuntu omdala okhona ngubaba, naye osahambile. Uvamise ukuzibuyela ebusuku. Umama yena akasekho.

ZONDI: Uhlobene kanjani noMzwakhe?

THANDI: UMzwakhe ungumfowethu, ngelama yena.

ZONDI: Uphi-ke uMzwakhe? Empeleni ngifuna yena.

THANDI: UMzwakhe akekho, usavakashile.

ZONDI: Uvakashele kuphi?

THANDI: Uvakashele eBotswana. Uzobuya esikhathini esingangesonto.

ZONDI: Ngifuna ulalelisise kahle ukuthi ngithini kuwe manje ntombazane. Uma kungase kwenzeke ukuthi kunenhlansana eyodwa yamanga kule nto ongitshela yona, uze wazi ukuthi uyobe usuzifake enkingeni. Angithi sizwene?

THANDI: Konke engikushilo baba kuyiqiniso. Akukho nokuncane okungamanga kulokhu engikutshele kona.

ZONDI: Kuyoba kuhle uma kunjengoba usho.

THANDI: Kunjengoba ngisho nje baba, ngikutshele iqiniso elimsulwa.

ZONDI: Ubomtshela uma esebuyile ukuthi uyafuneka ekamu lamaphoyisa eliseRichards Bay. Akabofika acele uSayitsheni Zondi. Yimina-ke lowo ngane yami. Ngizoshiya nali ikhadi elinemininingwane emayelana nokuxhumana nami.

THANDI: (Efunda ikhadi.) Ngizomtshela uma esebuyile baba.

(Esehambile uSayitsheni Zondi, uThandi ashayele uMzwakhe ucingo.)

THANDI: (Ekhuluma yedwa ebe echofoza izinombolo zikaMzwakhe.) Nkosi yami! Ngabe usenzeni-ke ubhuti? (Esekhuluma ocingweni.) Sawubona bhuti. Kunenkinga ekhona lapha.

MZWAKHE: Yebo Thandi. Kwenzenjani manje? Uzwakala unganeme.

THANDI: Kuyabheda ngempela. Kade kunoSayitsheni Zondi lapha ekhaya. Ungakhona ukukhuluma?

MZWAKHE: Singakhuluma ngoba sikwelinye lamagaraji, kanti noZama usaye endlini encane. Uthe ufunani lowo sayitsheni?

THANDI: Ubuze ukuthi ukuphi. Ngibe sengimtshela ukuthi uvakashile. Uthe nje uma ubuya lapho ohambele khona kuzomele uze kuyena esiteshini samaphoyisa saseRichards Bay.

MZWAKHE: Ungathuki sisi wami. Yinto ewubala kabi lena abeyizele uSayitsheni Zondi.

THANDI: Wavele wazithela ngabandayo nje wena bhuti. Akuyona neze into yokuthathwa kancane ukulandelwa amaphoyisa.

MZWAKHE: Ungabi novalo entanyeni njengexoxo. Iwubala kabi le nto abeyizele lowo sayitsheni. Awusho, ubekhona ubaba ngesikhathi kufika uZondi?

THANDI: Cha, ubengekho.

MZWAKHE: Siza-ke ungamtsheli lutho ubaba ngale ndaba. Uyamazi ukuthi ungumuntu onomsindo kanjani lowo. (Ebona uZama eza ngasemotweni.) Kulungile, sizobuye sixoxe. Khohlwa nje yindaba kaZondi okwamanje.

THANDI: Kulungile, angeke ngiyithi vu kunoma ubani.

(Bavalelisane, bavale izingcingo.)