The York chapter's mandate to the bishop of Durham for the council

Capitulum ecclesiae Beati Petri Eboracensis decano extra provinciam agente, archiepiscopali eiusdem ecclesiae sede vacante, venerabili in Christo patri Domino Richardo, Dei gratia Dunelmensi episcopo, eiusdem ecclesiae suffraganeo, salutem in sinceris amplexibus Salvatoris. Canonica nos ammonent instituta informataque dogmata sapientium causas arduas maioraque negotia convocato concilio communiter prudenterque pertractare ut propenso digesto concilio gerenda ad laudem Dei ecclesiaeque compendium subditorum etiam commodum et honorem valeat redundare. Eapropter nos ob quaedam varia et ardua negotia iura et libertates ecclesiae et provinciae Eboracensium qualitercunque subditorum communiter et divisim ac specialiter concernentia et in eorundem praeiudicium manifestius attemptata, praelatos et clerum diocesis et provinciae Eboracensium ad diem Lunae undecimum diem mensis Decembris proximo futurum [11 December 1340] coram nobis in ecclesia nostra cathedrali Beati Petri Eboracensis praedicta, cum continuatione et prorogatione dierum subsequentium decrevimus convocandos. Auctoritate igitur nobis devoluta et de iure attributa qua fungimur, sede Eboracensi vacante, tenore praesentium vos praemunimus et peremptorie citamus, et per vos priorem ecclesiae vestrae cathedralis Dunelmensis et capitulum eiusdem, necnon universos abbates et priores abbates proprios non habentes, exemptos et non exemptos, ipsorumque conventus, archidiaconos seu ipsorum archidiaconorum absentium vicarios, decanos etiam et praepositos ecclesiarum collegiatarum, necnon capitula ipsa totumque clerum vestrarum civitatis et diocesis Dunelmensium praemuniri et peremptorie citari volumus et mandamus, quod vos, domine episcope, abbates, priores, decani, archidiaconi seu eorum vicarii et praepositi personaliter, conventus vero et capitula ac collegia singula per procuratores singulos, clerusque vestrarum civitatis et diocesis per duos procuratores idoneos plenam et sufficientem potestatem ab ipsis conventibus, capitulis, collegiis et clero habentes, die et loco praedictis, cum continuatione et prorogatione praenotata, coram nobis compareatis et compareant, super proponenda vobis et eisdem in huiusmodi convocatione tractaturi, salubre consilium vestrum et suum impensuri, necnon ad ea quae ad honorem Dei ac defensionem et utilitatem ecclesiae et provinciae Eboracensium locorum et personarum praedictorum ibidem statuta fuerint ac communiter ordinata consensum vestrum et suum prout iustum fuerit adhibituri, facturi ulterius et recepturi in hac parte quod consonum fuerit canonicis institutis ac qualitas et natura exigit praemissorum.

Vos etiam praemunimus et ceteros per vos citandos praemuniri volumus et mandamus, quod contra absentes in termino supradicto, nisi propter evidentes causas et rationabiles, de quibus in eo eventu fidem feceritis et fecerint legitime fueritis et fuerint impediti tanquam inoboedientes contumaces iuxta iuris exigentiam procedemus.