[Officiales catasti comitatus]

MCCCCLVIII

Indictione septima die trigesima mensis septembris. Cum esset compertum quod dictus Jacobus Pagnogi di Ridolfis ut supra electus pro quartario Sancti Spiritus non erat etatis annorum quadraginta complectorum die initii dicti officii prout requiritur secundum dispositionem legis de electione dictorum officialium tractantis, habui ego Albertus Donnini Luce notarius extractionum officiorum communis Florentie colloquium cum eximio legum doctore ac egregiis viris domino Benedicto domini Micaelis di Accoltis de Aretio dignissimo maiori cancellario florentino et ser Bartolomeo ser Guidonis Iacobi Guidi scriba reformationum et ser Antonio Mariani Mutii secundo cancellario dicti communis, ad quos et me simul cum eis pertinet in hoc casu et in similibus nostri temporis iudicare quid esset fiendum, quoniam dictus Jacobus quia non est capax officii ratione minoris etatis et ab illo propterea vacat, et ipse Jacobus et Alexander Filippi de Machiavellis fuerunt simul concurrentes et positi pluries ad partitum ipsi duo soli pro dicto officio pro quartario Sancti Spiritus, an sit redeundum ad scructinandum de novo pro dicto quartario Sancti Spiritus an vero dictus Alexander sit assumendus absque aliqua scructinatione propterea fienda. Et habito inter nos quatuor diligenter examine et visa dicta provisione et intellecta eius dispositione, tandem remansimus, auctore principali prefato domino Benedicto sicut decet et decisore, quod dictus Jacobus ipso iure ab officio vacet et dictus Alexander assumatur, non quia de rigore iuris assummendus sit sed propter observatam simili modo consuetudinem in pluribus similibus casibus preteritis ante assumptionem mei Alberti ad officium extractionum prefatum, que consuetudo vim legis obtinere asseritur.