Olukaban’ ulim’ olukhuluma

Lunyakazise imithambo

Yezinhliziyo neyamakhanda

Ezilwane nemithi nenhlabathi;

Okhulumela kude naseduze,

Kodwa kuvele kufane;

Okhuluma ngivuka nanxa ngilele,

Nokho ngivele ngimuzwe?

Olwembong’ ebongel’ abangekho,

Nelembong’ ebongela ngisezwa.

Ngizw’ ikhuluma phans’ entshonalanga

Laph’ imililw’ ebomv’ iqhamuka khona,

Nalapho kungephuzela khona

Amalangab’ omnyama nokwesaba,

Nalapho kuphuma khon’ uqwembe

Lwembes’ umhlaba ngezinkanyezi

Eziqakamba ngivuke ngigozobale.

Mbong’ ubong’ umhlab’ usakhasa,

Wakhula won’ umhlaba wema,

Wadlubulunda ngaphambili,

Kodwa wena Mbongi walikoza

Ngokubonile nokuzayo,

Ubikez’ abaphansi bamathongo

Abakuthume ngolimi,

Thina sikhuluma ngekhubalo.

Konje ngabe yim’ engikhulumayo,

Noma ngabe nguwe Thongo likaMbongi?

Ngabe ngizwe kahle noma

ngiyahlongozelwa?

Ngingakazalwa umhlaba wawungenandlela;

Ungaziwa, ungaqondakali, ngawubamba.

Ngizwe umemeza, Mbongi, phambi kwami,

Wangihola ngodondolo ngin-

gaboni, ngabona.

Ngidedele ngibonge, ngivul’ indlela nami

kwaMhlaba.