Ukuya kwam eIndiya ndandulelwe nguRev. J.C. Mvusi (Durban) yena esiza kule ndlu kwintombi yakhe le yendele kuKigundu. Kuthiwa umfundisi lo wazimisela ukuya eJinja aye kulalela ukubona ingwenya ebhrorhweni yeNile; walinda, walinda, walinda wada phakathi kobusuku wayibona, lazaliseka elakhe ibhongo. Makube ungumNgqosini umfundisi lo xa eyinonelela kangaka ingwenya.

Kuse ngoMgqibelo 4 kweyoMdumba 1950 ndikhweliswa kuloliwe zizo zonke izihlobo zaseKampala ngo-10 emini ebumandini noko kubuhlungu ukwahlukana. Yatsala yona inqwelo engenanceba, ujujuju, yangena ngexesha ledinala eJinja apho ndihlangatyezwe yinjinga yakhona uLubogo lowa besiphosene naye ngeCawa. Undihlisile kuloliwe esithi unecebo lokundibuyisela kwakuye ngesinye isitishi ngendlela enqumlayo emva kweeyure ezine loxa uloliwe esajikeleza ingqwimba yokuya eMbulamuthi entla, khon’ ukuze ndibone nosapho lwakhe neendawo ezintsha zelizwe. Ekubeni ndihlile ndiqondile ukuba ukholose ngento ebonakalayo, umcagogo wemoto (Limousin) ebuso busixangxathi eneewotshi ezibetha ingoma. Inene eli yinkosi yegazi, yecandelo labaGanda ekuthiwa ngamaSoga. NguNondyebo weso sizwe kwarhulumente. Siqale savelela iiofisi zakhe, saza sanyuka induli ukuya endlwini yakhe esentabeni (njengekaMzimba eDikeni) ekhangele eVictoria Nyanza. Ekhaya apha ndixhamle ububele bosapho nezalamane. Unonyana owafunda kum eFort Hare nabanye abakwezinye iisinala. Emva kwethuba sindulukile ngohambo lwama-60 eemayile ukubuyela kuloliwe; sacanda emadotyeni nasezintsunguzini zamahlathi simana simisa sihlola ama-‘gombolola’, oko kukuthi amakomkhulu ezibonda, imizi ephilileyo, wena, nebukekayo ngenxa yezakhombe zeenkundla zokuthetha amatyala phantsi kwemithikazi emasebe azixwexwe. Le nto isibonda indilekile kweli, lihomba qha, alikho ikrune (ixwebethu). ULubogo uthe asikho isilambi eluGanda kuba iinkosi zabalungiselela ukutya abantu abahageleyo neenkubele. Sivelele nezikolo zeemishini, sagqibela ngelitye lamaIndiya elibopha amabhali omqhaphu (Cotton Ginnery) kuqeshwe amaAfrika. Onke amashishini neevenkile apha emaphandleni zezamaIndiya. Phofu amawethu ayajubalaza ngemithananangu (amalinge) yorhwebo kodwa ayashiywa. Umlungu yena akakho mpela ngokuba akakwazi ukunyamezela ukuhlala yedwa nomkakhe entsunguzini yehlathi njengoko esenjenjalo amaIndiya; aye esanda nkqi amaIndiya ngenxeni yokuba umfazi kuwo uzala umntwana yonke iminyaka. He!

Okunene simfumene kwakhona uloliwe, sahlukana noLubogo.

Ukubuyela eMombasa

Apha endleleni siphawule ukuba anqabile amahashi; lithi elinye esilibonileyo libe lelesityebi esiligcine ngamayeza linqakwa ngokomntu. Isizathu kukuba zininzi izifo ezibulala amahashi neenkomo. Kakade sivela kula mazwe isifo seSikoso (East Coast Fever) esi seza nodipho kuthi. Azi bangathini na beye emaMpondweni apho inani leenkomo lilingana nelamadoda, ibe sinyhola indoda eswele ihashi.

Into ehlekisayo kuloliwe wala mazwe ngamakhwenkwe anentlondi yokuba ukukhwela engenamali, ajinge phandle ezintsimbini zocango aze atsibe isabaleka itreni xa isondela esitishini esilandelayo azimele apha esinyakanyakeni sabantu esukeliswa ziigadi namadindala kube sisiphithanyongo ukugilwa kwabantu. Apha uloliwe uphethwe ngabantsundu aze ke amakhwenkwe enze umdlalo wokukhwela ngelize.