ASSIZE ROLL 32

Placita coram Reginaldo de Grey de Ruthyn et socijs suis iusticiarijs domini regis ad audiendum et terminandum assignatis virtute commissionis eisdem directe in hec verba.

Edwardus dei gracia rex Anglie et Francie et dominus Hibernie dilectis et fidelibus suis Reginaldo de Grey de Ruthyn Gerardo de Braybrok’ Roberto de Thorp’ Hugoni de Sadelyngstanes Galfrido de Lucy Iohanni Mareschal de Wotton’ Petro de Salford’ Iohanni de Rokesdon’ et Iohanni Dardern’ salutem. Sciatis quod assignauimus vos coniunctim et diuisim ad pacem nostram necnon ad statuta apud Wynton’ et Norhampton’ pro conseruacione pacis eiusdem edita in omnibus et singulis suis articulis in comitatu Bed’ tam infra libertates quam extra custodienda et custodiri facienda; et ad omnes illos quos contra formam statutorum predictorum delinquentes inueneritis castigandos et puniendos prout secundum formam statutorum eorundem fuerit faciendum; et ad ordinandum superuidendum et faciendum quod omnes et singuli homines in comitatu predicto infra libertates(eti) extra iuxta eorum status et facultates armis competentibus muniantur arraientur et parentur et de incedendo et auxiliando vobis et cuilibet vestrum in hijs que pacis et statutorum predictorum conseruacionem concernunt ipsos compellendos prout melius fore videbitur expedire. Assignauimus eciam vos octo septem sex quinque quatuor tres et duos vestrum iusticiarios nostros ad inquirendum per sacramentum proborum et legalium hominum de comitatu predicto tam infra libertates quam extra per quos rei veritas melius sciri poterit de quibuscumque felonijs et transgressionibus in eodem comitatu infra libertates vel extra per quoscumque et qualitercumque factis; et ad omnes huiusmodi transgressiones ad sectam nostram tantum audiendas et terminandas secundum legem et consuetudinem regni nostri Anglie; et ad processus versus omnes quos de felonijs huiusmodi contigerit indictari quousque capiantur reddantur vel vtlagentur faciendos. Assignauimus eciam vos octo septem sex quinque quatuor tres et duos vestrum quorum alterum vestrum vos prefati Roberte et Hugo vnum esse volumus iusticiarios nostros ad felonias predictas audiendas et terminandas et ad omnia indictamenta feloniam tangencia coram vobis iam vltimo assignatis facta ac processus de huiusmodi felonijs coram vobis nondum terminata; ac eciam vos octo septem sex quinque quatuor tres et duos vestrum iusticiarios nostros ad omnia alia indictamenta feloniam non tangencia coram vobis facta ac processus de eisdem nondum terminata debito fine terminanda secundum legem et consuetudinem supradictas.