Cambridge, Corpus Christi College 140 (71r–72v)

[71r] Men þa leofestan, her onginð þæt halie gewrit þe com fram heofenan into Hierusalem. Soðlice hit gefeol beforan þam gaton Effrem, and þær hit wæs funden þurh anes preostes handa, þæs nama wæs Achor. And he hit sende to anre oðre byrig to oþrum preoste, þe genemned is Ioram, þe hit asende fram Bethania byrig to oðrum preoste, þe genemned is Machabeus. And he hit asende to monte Garganum þær sancte Michaeles circe is þæs heahengles. Soðlice þæt ylce gewrit þurh Cristes willan ures hlafordes com to Rome to sancte Petres byrgene. And ealle þa men þe wæron on þam burgum þær þæt gewrit to com, dydon þreora daga fæsten and halie gebedu and ælmessan, þæt ure milda hlaford heom fultum sealde and geopenode gewitt on manna heortan to oncnawenne ures drihtnes hælendes Cristes mildheortnesse. Eac hit segð for hwilcon þingum þis gewrit com to Hierusalem and to oðrum burgum þus gesutelod. And hit com on þone halgan sunnandæg, and þæt folc soðlice budon þone ylcan dæg to mærsianne mid micelre gecyrrednesse and geleafan.

On sunnandæg nan man ne healde gemot, ne ne demon domas [71v], ne aðas ne swerion, ne grindan, ne hlafas bacan, ne bicgan, ne syllon on þone halgan sunnandæg, ne wyrtan on wyrtune ne gaderion, ne nanne ne tælon, ne nane huntunge nabbon forþam soðlice þurh þas þing bið þes middangeard forworden and cymð Godes yrre ofer eow.

Eala yrmingas, nyte ge þæt God geworhte heafenas and eorðan, sæ and eal þæt þæron is on syx dagum, and syððan geworhte þone forman man Adam, and for his agægednesse fif þusend and twa hund and viii and twentig geara rihtwise and synfulle on helle forlet. Crist com for us on þisne middaneard on þeowan hiwe and micel for us þolode, and æfter his æreste to heofena rice rihtwise clypode. Ic eow bidde and mynegie, abysegiað eow þa hwile ge þæs fyrstes habbon on eowrum gebedum and on fæstenum and on wæccan and on ælmessan and on mycelre forhæfdnesse eoweres lichaman. Gað to cirican gelomlice and settað rodetacn geond eower hus.