2r

MEMOIRE pour l’ordonnance des hystoires et misteres qu’ilz seront contenus, faicts et protraicts en une tapisserie, où, nottemment sera démonstrée, et par escript déclarée, la vie, légende et dévote conversaciòn du glorieux sainct Urbain, martir et premier Pape de ce nom.

Et premiers.

A l’intencion et dévocion du donneur de ladicte tapisserie seront faicts et protraicts ung priant et une priante: mains joinctes et genoulx flexis: iceaulx honnestement vestus et habituez, avecques aulcuns enfans, filz et filles, à sa discretion mis et ordonnez au commencement du premier drap d’icelle tapisserie; avecques le glorieux sainct Urbain, lequel, en habit de Pape, fera manière et contenance de les offrir et présenter à Dieu. Et darrière eulx, au principe et commencement dudict drap sera protraict et peinct une arbre, au meileu duquel aura ung estoc auquel sera suspendu ung escu contenant le blason des armes dudict donneur; c’est assavoir, d’azur à trois chandeillers d’or [et auprez d’icelluy l’escu et blason de sa femme a ung aultre estoc au dessoubz]. Et à l’entour de la tige de ladicte arbre, seront comme deux grans rosleaux mis et affichez à icelle, en chascun desquieulx sera escript: Louange à Dieu, qui est la devise du prédit donneur.

Item, et pour venir à la déclaration de la bieneureuse vie du dévot sainct Urbain martir, sera consequemment protraict ung tabernacle domestique, en forme de palais; dedans lequel sera faict et peinct le glorieux sainct Urbain, vestu et habitué en manière d’ung jeune enfant escolier, lequel, mains joinctes [et] les yeulx

2v

eslevez en hault, sera humblement prosterné à deux genoulx devant ung autel, dessus lequel seront protraicts les ymages du glorieux Crucifis et de la saincte Vierge Marie. Et en ung lieu à part dudict tabernacle seront peincts et protraicts ung homme et une femme noblement vestus et habituez, [portant chaisnes d’or au col, et en estat de noblesse,] MEMOIRE for the organization of the hystoires and misteres to be included, and portrayed in a tapestry, where the life, legend, and sacred company of glorious St. Urban, martyr and first Pope of this name, will be memorably represented and described in writing.