Isigcawu 1

(Kuthe ngakusasa ebusuku oDingane noMhlangana noMbopha baphenduka, kwathi emva kancane kwamabili babetheleka ebukhosini.)

UDingane: Mbopha, hamba phambili uyobona ukuthi ubani osesangweni.

UMbopha: Ndabezitha !

UGqayinyanga: Hawu, nalapha nonke, ubani osempini?

UMbopha: Khulumela phansisonke nobani?

UGqayinyanga: NoJeqe ulapha.

UMbopha: Kwakuhle ngamthola, silapha nje ngizofuna yena, usidukele ebusuku izolo, base bethi abantwana angizomfuna.

UGqayinyanga: Uthini okaSithayi?

UMbopha: Thula uze ufe wethu, ngizongena ngentuba namabutho amabili engihamba nawo ukuze ngimjume abone sesiselawini lakhe.

(aphindele emuva)

UDingane: Kunjani?

UMbopha: UJeqe ulapha.

Bobabili: Ubani?

UMbopha: Usefikile, manje sizokwenzenjani?

UMhlangana: Nakho phela ukulanda kukaMbopha.

UDingane: Kahle mfowethu ukusifaka amanzi emadolweni; akummango ungenaliba, futhi akusekho ukuya emuva. Kuhle singalali ngaphakathi emzini wenkosi, kufanele siyofuna ingosi ngasesizibeni esigeza inkosi lapho kuphuma ilanga. Ngoba wena Mbopha ugqayinyanga usekubonile, kuzoba kuhle uyobona uMkabayi umbikele lenkinga esikuyo, mhlawumbe yena angalenza isu lokwehlukanisa uShaka noJeqe, ukuze inyamazane siyifice indle. Kulungile uyosifica enqabeni.

UMbopha: Lapha kulele khona isilo awasondeli amanketshane kodwa kulula ukuba iwundlu lifumane isikhundla.

UMhlangana: Uqinisile uMbopha, kufanele kungene uDingane.

UDingane: Kulungile bafowethu, ngilindeni lapha.

(angene)

Isigcawu 2

(Athi thwayi thwayi uDingane ebange elawini likaMkabayi, asho azithele phezu kwenceku.)

Inceku: Zibike! (kuthi nya) Zibike!

UDingane: OweZulu. (enyenyeza)

lnceku: Awu, dlula zinyane.

UDingane: Baba, baba, baba.

UMkabayi: Ubani lowo?

UDingane: Yimi baba. (athi lungu uMkabayi)

UMkabayi: Kahle ngiyeza khona lapho. (umzuzwana) Kunjani ndodana usuzongibelethisa ithunga yini?

UDingane: Sisebunzimeni obukhulu baba, uJeqe sizwa ukuthi usebuyile, okusho ukuthi kuzoba lukhuni ukuthola inkosi ngoba uzohamba nayo uma isiyogeza.

UMkabayi: Ungesabi Dingane, kusasa inkosi izobe yelashwa inyanga yayo enkulu lapha ekhaya; izongeniswa esibayeni ihlanziselwe khona nje-ngoba ubona izinkomo zilaliswe ngaphandle nje.

UDingane: UJeqe?

UMkabay:i: Suka Dingane, musa ukuba yivaka kangaka, nakuba uJeqe efanele ukuphalaza ne nkosi, akakwazi ukuvela ayolashwa engazange ayidle imithi ethile angakwazanga ukuyidla njengoba efika manje ebusuku, akakwazi futhi ukuyongena esibayeni nenkosi hleze ayeleke ngesithunzi esibi; inkosi iyovuka nenyanga yayo kuphela okuzobe kuyiyona ephethe ukhamba lwayo.

UDingane: Sizomthatha umgqaka baba, kulungile sengiyobonana noMhlangana.

UMkabayi: Ungazithatheli izinto phezulu Dingane, lalela ngikutshele. Nizongena niyobhaca emva kwesibaya; ningangeni kodwa inyanga ize ichele. Yothi ingachela ningene nibande ngezimpundu zesango, ingene qede isihola inkosi, nigxume niphonseke phakathi kwabo, uMbopha avele ngemuva amgwaze. Amehlo amhlophe.

UDingane: Jama! (Aphume ayobikela oMbopha bese beyolungisela ukuyobhaca njengoba eshilo uMkabayi)

Isigcawu 3

(Elawini lenkosi kukhona yona inkosi nenyanga yayo.)

UShaka: Sekuyikho khukhuva?