Quant la princepce ou haulte dame sera en son lit au matin veilliee de somme et elle se verra couchiee en son lit entre souefs draps, avironnee de riches paremens et de toutes choses pour aise de corps, dames et damoiselles entour elle qui l'ueil n'ont a aultre chose fors a avisier que riens ne lui faille de tous delices […] les genoulx flechis pour lui administrer tout service et obeir a tous ses commandements, adonc souventes fois avendra que temptacion l'assauldra, qui lui chantera tel leçon:

Beaulx Sire Dieux! est il en ce monde plus grant maistresse de toy, ne plus auctorisiee? […] Il n'est si grant dont tu ne venisses bien a chief. […] Toutevoyes tielx et tieulx, ou telles et telles, ont eu arogance contre toy et ont cuidié par leur oultrecuidance pouoir a toy, et ont fait tieulx et tieulx choses a ton desplaisir et prejudice. Si t'en vengeras bien, un temps venra.