Ẹdẹ Màpó Àrógun, Ìlú ńlá

Ẹdẹ Màpó Àrógun, Ìyàkùn àgbò

Ẹdẹ Màpó Àrógun ìlú Tìmì

Ìlú tí a mọ̀ fún sùúrù tí kìí ṣagídí

Ìlú ti a mọ̀ nílùú ẹ̀sìn, a dúró déédé,

Mùsùlùmí ìlú Ẹdẹ kéwú wọ́n tún ńkírun

Onígbàgbọ́ ìlú Ẹdẹ wọ́n dòpó Jésù mú

Ẹlẹ́sìn ìbílẹ̀ ńṣe tiwọn láì díra lọ́wọ́

Sẹri pé Àgbàlé gbajúmọ̀, ó ní láárí

Àgbàlé gbajúmọ̀, a ma ntoto

Àgbàlé gbajúmọ̀ ó mohun tó yẹ

Tìmì Àgbàlé àkọ́kọ́ tán j’ásíwajú Ẹdẹ

Ipa rere tán fi lélẹ̀ kò ti ẹ̀ parẹ́

Tìmì ò dédé j'ọba l’Ẹ́dẹ, ẹ tẹ́tí ẹ gbọ́

Ọ̀rọ̀ ló se bí ọ̀rọ̀, ẹ síwèé ìtàn wò

Àwọ̀n jàgùdà ọlọ́sà ní ń yọ Ẹdẹ lẹ́nu

Wọ́n jíwa léwúrẹ́ kó, wọ́n ńkó wa nírúgbìn lọ

Wọ́n ń pawá lọ́mọ, wọn tún fẹ wa láya

Òkìkí kàn délùú Ọ̀yọ̀ ní bi t’Ólúkòso ti ń jọba

B’Ólúkòso ti gbọ́rọ̀ yìí ló bá fárígá, n ló bá bínú

Ìbínú yìí pọ̀ púpọ̀jù tó fi jẹ́ wípé

Lalala bùlà bùlà bùlà bùlà niná ń yọ lẹ́nu Ólúkòso

Wéré wéré wàrà ǹsàsà lọbá bá ránṣé sí Tìmì

Kówá lọ gbàwọ́n sílẹ̀ lọ́wọ́ ọlọ́sà ìlú Ẹdẹ

Akíkanjú ni Tìmì tẹ́lẹ̀ jagun jagun tún ni

Ó ti rogun láìmọye

ìgbà tó darí wálé láì farapa

Tìmì Àgbàlé Ọlọ́fà Iná

Tìmì Àgbàlé Ọlọ́fà ìjà, akíkanjú lógun

Aláyà bí àrà ni Tìmì Àgbà

Jagun jagun l’Àgbàlé a wí fún ni kó tó dáni

Ó fojú ọlọ́sà rí màbo nígboro Ẹdẹ

Ó sewọ́n kása kàsa, ó tún sewón kàsà kàsà

Ó fọfà iná se kísà

fúnwọn ní wọn bá sálọ

Ọ̀pá kan soso mà ni Tìmì òò

Ọ̀pá kan soso tí ńdagba mààlúù

nígbó

Kò fólè kò fọ́le ló jẹ́ kó láwọn ọlạ́sà lugbó

Iná pẹ̀lú ẹ̀tù wọn ò

lè gbé káriwo má sọ

Ààyá pẹ̀lú ẹ̀tù wọn ò

lè gbé káriwo má sọ

Aáyán pẹ̀lú adìyẹ wọn ò lè bárawọn gbé

Kẹ́nìkan má finú ilé sílẹ̀ fún ẹnìkan

Ìgbà tí a lé ọlọ́sà lọ tan nìlú Ẹdẹ rójú

Ìgbà yí la tó mọ̀pé Tìmì ò rorò

Oní fàájì ni Tìmì bóbá dọjọ́ àrìyá, Ẹdẹ kó ni mára

Ẹdẹ ló nìlù ló leré Ẹdẹ lólorin

Ẹdẹ Màpó Àrógun ò kéré níbi fàájì ò.