MARIVS PLOTIVS SACERDOS COMPOSVI ROMAE DOCENS DE METRIS.

Cum de institutis artis grammaticae primo libro me tractavisse comperisset vir clarissimus Vranius, nec ei displicuisset, vel quod non absurde compositus, vel quod ad eius filium virum clarissimum mihi contubernalem et aetate paene studiisque coniunctum Gaianum scriptus esset, compulit ut etiam de nominum verborumque ratione nec non etiam de structurarum compositionibus exprimendis breviter laborarem. cuius praestantissimi viri iussionibus libens arbitror libro secundo nos explicabiliter oboedisse. nunc in hoc sive tertio sive novissimo artium libro, ab eodem summo viro commendatus vobis viris amplissimis, nobilitatis splendore praedito Maximo et omni laude praedicabili Simplicio, quorum et ad quos seria non nisi de litteris exercentur, quoniam iubere dignati estis, me posse etiam de metris ∥ tractare iudicastis, breviter esse componendum decrevi. sed quoniam metrorum rationem dicturos prius decet pedes considerare, quibus sunt carmina modulanda, de horum numero, nomine, nominum derivatione schematibusque, quam verissime poterimus, breviter explicemus.

DE PEDIBVS

Sunt igitur pedes alii disyllabi, alii trisyllabi, quorum unde nomina deducta sint doceamus et quot habeant schemata. sunt et ex disyllabis geminatis pedes tetrasyllabi, quorum et nomina et schemata subiungemus. sunt et ex disyllabis et trium syllabarum pedibus copulatis | pedes syllabarum quinque et ex duplicatis trisyllabis pedes senarum syllabarum, de quibus non arbitror esse necessarium diligentius laborare.