IN principio erat uermis. hoc de uerme, cui nomen est caenorhabditis elegans, non nunc primum in hac curia dico. paruulus est, uix tam longus quam lata est pars dempta unguiculi. hermaphrodita pars plurima eorum, sed nonnulli sunt mares, unde uariari potest genus. mouentur, procreant, comitantibus aliis ita se gerunt ut pari motu nare uideantur. cellulae sunt adulto (atque adoleuit triduo) DCCCCLIX; homini autem sunt termiliens centena milia. iam profecto uideritis quanto se commodius uermis ad totam suam inuestigandam naturam quam homo praebeat.

non tamen uermem honorandum praesento sed hunc uirum, qui dum fere XXX annos ei studet cellularum omnium origine patefacta aliquas ipsis oculis animaduertit eo fato esse ut ortae mox morerentur: unde fit tabula fatalis ut dicunt. deinde paucis adiuuantibus totam uermis seriem indicare pergit: quod animal primum omnium seriem suam cognitam totam habet. sed opere nondum confecto, cum iam multo magis instaret hominis series ut ea quoque nosceretur, plurimos aedificio ad rem quasi consecrato praefectus fouebat, regebat, hortabatur. de quibus dixit inueniendum esse quid quis melius quam ipse posset; id tum tradendum munus.

ita paulatim – nam scientiam cum liberam esse uellet eis semper fortiter resistebat qui in sordidam mercedem auellere gestiebant – tabulam seriemque cellularum humanarum ad tertiam partem exposuit. haec series cognita immane quanto erit usui ad causas morborum et debilitatum quibus affligimur intellegendas.