CARMINIS illius meministis quod olim de sonis certius imitandis conscriptum est?

eodem fere tempore hic uir, trans Atlanticum educatus erudiri in doctoris gradum apud nos cum mallet, se cum eis coniunxit quos duxit Ellis Coslett, Collegi Corporis Christi tum socius. is omnium qui secum studuissent maxime hunc praestare dixit qui conata prospero efficeret euentu; hic uero opinatur se potius auctoris opus suscepisse: accepto enim auxilio tamen ad ultimum necesse manus ipsius imponatur.

soni natura non simplex: elementa sunt nonnulla quae Magneti filo si seruaueris sibila fiunt. quod ne accideret, non modo inuento quid fieret – sunt ea primum augenda dum seruas, postea comprimenda – ingeni naturam uel adulescens ostenderat, sed etiam edicto iure quominus si quid ab uno sit inuentum usu fruatur alter nisi per inuentorem licuerit. at licet, et accuratissime licet, ut si qui petant, bene intellecto quid faciant felici et sibi et ipsi fruantur euentu. ita sollicitudine liberatus ne perderet operam, elaboratorio aedificato suo in rem subtilem adeo usque penetrauit ut testimonium ingeni delta duplex impressum nusquam non uideas; aut in aula quam Artium uocamus accipias aure monumentum et praesens qua est benignitate et renouata futurum.