IN uitis sanctorum scribendis primum memoriae prodi solet origo hominis, ut designatus ad uirtutem ab initio esse uideatur. hic uir in altera Britanniae insula natus, unde multi sunt labris quasi melle libatis orti, mox Salopiae, insigni linguarum priscarum nutrici, deinde Oxoniae studio rerum gestarum instructus collegi Omnium Animarum socius anno suo altero et uicesimo electus est. quid isto cursu beatius?

uitam inde agit sapientis: sermonibus et libellis discipulos docet qua ratione sit mundus ille antiquus Augustorum et Caesarum cultu unius dei crebrescente mutatus in alium. primos sermones qua est uerecundia in cubiculo collegi habebat, sed tanta frequentabat multitudo ut libenter audituri per tecta se funibus demisissent. mox edidit librum primum de Augustino Hipponensi mira doctrina, mira elegantia conscriptum; deinde inuestigatis uiri sacri ortu et officio, paginis XX fere studium ultimorum saeculorum antiquitatis omnino in nouum, non tam rebus gestis ducum quam uoluntatibus sententiisque popularibus deditum, unus conuertit. nam moueri et uolgus et duces demonstrauit auctoritate potius eorum qui sibi disciplinam et mentis et corporis grauissimam in nomine Christi imponebant: qui dei uestigia in loca deserta secuti sapientiores consilio redibant.

has res altius explorare non desinit, operibus multis editis quibus non minus argumento et ratione persuadet quam rerum leuiorum lepore permulcet: Olympiodorum enim quendam legatum principis commeare comitante psittaco qui puro Attico sermone loqueretur. non dubium est quin sermonibus librisque suis in haec studia multos hic uir adduxerit.