GEORGIO tertio eius nominis rege mortuo bibliothecam Museo Britannico ea condicione legatam tradidit filius ut a populo inspici posset. nouam Britannicam librorum aedem cum hic uir parabat condiciones erant innumerabiles et ab ipso ad opus apte et eleganter exstruendum et ab aliis impositae, sed regia illa princeps fuit. nam libros eius in aede media spectare licet in turri uitrea conditos rubro giluo nigro colore spinarum auroque tenuissimo refulgere. totum est artis summae consilium, opus summae patientiae.

sermonis egestate praecisus hoc a uobis peto, ut ipsi cum exteriores tum interiores partis uisum eatis. nullum magnificentius hoc saeculo dicitur aedificatum aedificium. omittite insciorum conuicia, sordes senatus si potestis despicite, inuenite potius monumentum aere ligno lapide uitro latere exactum quo nullum aptius ad munus est, nullum amplius spatiis formaque concinnius. eius fortasse misereat qui proxime sancti Pancrati mansionem aedificet, sed etiam ad istam uicinitatem congruenter facit.

‘in usu ratio.’ sic dixit uir sapiens quem citare hic solet. quibus usus est bibliothecae laudes gratesque agunt. sed ex uno tamen eoque tam multiplici difficilique opere famam laudesque tantas mereri paene mirum esset, nisi mereretur uir non modo in arte exercenda profitenda illustranda tam promptus sed etiam pictura philosophiaque recentiore tam eruditus. Bibliothecae Britannicae nimirum dicetur a posteris auctor: maturitatis opus est. est et amoris opus; iam enim architectum citare oportet quem admiratur ante omnis: ‘fenestram cum parabis finge prospectantem’ is ait ‘puellam tuam.’