VNIUS aetatis spatio num magis umquam mutata sunt tempora? nam quo anno hic uir natus est, in caelum se primo sustulerunt fratres Fabri, machina spe lignoque conglutinata; iuuenis ipse secutus est, ea quae liceat Cleopatra blattaria nominetur; tum LXXV natus annos id genus machinae gubernare didicit quod aere sucto se tollit: quod facilius ait esse quam priora gubernatu, sed quo celerius eo magis pertinere quanta celeritate ipse prouideas.

illa meminisse iuuerit tempora, cum ab hortulo suo tolli, muliere fortasse comitante uolare, quouis descendere et excipi solebat; sed alia quoque memoranda sunt, cum gubernatores ad bellum cum tyranno Germanorum gerendum Daedalus Icaros multos instruxit, perdidit nullos, uel cum recentius adeo XV diebus effecit ut machina cui Hercules nomen est suco dum uolat repleretur ut in Atlanticum usque australe uno perueniret itinere.

Idem uero sibi suisque idem urbi uniuersitati patriae prouidit consuluit subuenit: semper enim, ut poeta paene dixit,

nec uiam modo Iesu dictam reputo, unde e commercio illo curruli res est prouecta ad hortum in portus usum uertendum, ad rostrum flectendum Concordiae, ad uincula cum societatibus transatlanticis constituenda. his aliisque consiliis augetur urbs et obicitur multis quid mercede faciant; miraculum Cantabrigiense quod dicitur hic uir impetu praecessit suo, nec noluit sodaliciorum plurimorum qua est liberalitate patronus esse. uerbis tribus tituli gentilicii totidem addamus: Felix tam longa qui prosperitate laborat.