HO thata ho utlwisisa nnete ya puo ena e reng motho a ka ba le mahlo a mpa a se ke a bona. Empa ho jwalo. Ha ba bakae ba nahanang hore dimela di a phela. Ha re nahana dimela tse phelang, eya be e le ha re nahana dimela tse kang poone kapa mabele leha e le meroho eo re e jalang masimong a rona. Empa le teng ha re re di a phela, re a be re bolela hore di a mela. Leo e hlile ke lona lentswe leo re le sebedisang haholo, hobane ho phela ha dimela ho rona ha se ho phela ho tshwanang le hoo re ho bolelang ha re re motho o a phela kapa phoofolo e a phela. Re ho nka ho fapane. Mohlomong ke hobane di sa tsamaye, di sa lle, di se na mahlo, ditsebe, melomo, jwalojwalo.

Kwana e ntse e le hantle hore re se ke ra di hopola di phela jwalo ka rona, di ena le hona ho utlwa bohloko. Ho ja re di sheba jwalo, o re ekaba ho ka be ho le teng mosadi ya hleng a nke thipa mme a kene tshimong ya hae a kge dihaba kapa dinawa a sa thothomele? Ba bangata ba ka be ha hana jwale ka ha ha hana ho hlaba kgoho. Ke ofe mohlankana ya neng a tla kenya palesa baking ya hae a ilo fereha? O ne a tla hanwa, ho thwe o sehloho, ha a na pelo ha e le moo a bolaile palesa! Ho kga sehaba sa eie ho ka be ho tshwana le ho ntsha sephaka sa nku e ntse e phela, mme o e tlohella hore se tle se hlomele hape. Re ka be re hloka moo re tsamayang kapa moo re paqamang ke ho tshaba hore re ka tloha ra utlwa jwang ho se ho re: “Itjhuu! O a mperella hle, wena motho!” Re ka be re se re ena le mokgatlo o qosang ba tshwereng dimela tsa bona hampe.

Empa nnete ke hore di a phela, jwale ka nna le wena. Di a phefumoloha le hoja di se na Matshwafo. Hoo ha ho tshose hobane le ditlhapi ha di na ona empa di ntse di nka moya o motle mme di ntsha o mobe.