IECUR si quis penitus cognitum habere dicatur, aut haruspex aut Apicius quidam, ficato gauisus, putetur audire. sed ‘hariolos, haruspices, mitte omnis:’ haec femina ‘non hariolans ut illa cui nemo credidit sed coniectura prospiciens’ inter uisa et coniecta artiores aliquanto nexus petit; Apicius autem iecur quod huic curae esset potius gigneret quam comesset.

nam per annos iam plus L, ex quo nomismate aureo donata pro opere de morbis iecinoris ad medicinae doctoris gradum conscripto ab Vniuersitate Edinensi Londinium migrauit, studia iecinoris et bilis tam discipulis quam libro (iam nouiens sua manu edito), tam remediis datis quam rationibus excogitatis ita promouet et adiuuat ut unius in aeuo morbi quem ήπαττιν uocant pars maior e gentibus fieri possit ut omnino expellatur, nec fere quisquam his rebus studeat cui non huius praeualuerit auctoritas. etenim fere prima uiuentis hepatici iecur acu longa tenuissima terebrata pupugit, cuius per tubulum altera etiam tenuiore et hamata immissa offam quam inspiceret excerpsit. sic rursus dat signa iecur, at multo certiora, patiturque Prometheus uulnera, at multo salutariora.

nulla prior medicinam est femina professa; nulla in collegio Regali Medicorum prior praesedit censor, nulla prior pro praeside; omnium consensu dux est hepatologiae, et cum omnibus laboris operaeque suae communicat gaudium.

praesento uobis Ordinis Excellentissimi Imperi Britannici Dominam Commendatricem, in Vniuersitate Londinensi Medicinae Professorem Emeritam,

SHEILA PATRICIAM VIOLETAM SHERLOCK

SOMEONE said to take a keen interest in liver might be thought to be either an ancient reader of entrails or a gourmet who relishes foie gras. Soothsayers and their ilk may be dismissed at once.