IN huius pictoris secta pictor est unus multiplicesque sectae: nam multis se generibus artis exercet, neque uno titulo comprehenditur. singulorum enim imagines saepe pingit, non neglecta sua, idque primum cum uix moris pictoribus imagines facere erat. spectat recta ad eos, eique plerumque recta ad eum; in media tabula locantur recti uel sedentes, singuli uel bini aliquando - nisi forte coniuges illos recordamini cum fele depictos, tabulam clarissimam solitoque more prae ceteris, dispositione partium quae simplex uidetur esse uiuidisque coloribus, compositam. multas autem calamo cerulisque usus conficit, neque id tum moris nisi ad exercitationes faciendas erat; paret manus oculo sine ullo interpretationis errore. saepe praeterea aqua depicta quomodo reddantur fluctuationes eius et perluciditates, subiti impetus atque otia lente restituta, perquirit; tabulam recordemini precor aspersionis maioris nomine dictam. cum primum inter Americanos incoluit - sed redit, reditque ruris Eboracensis sui semper appetentior - Hogarthianum imitatus exemplum ganeonis cursum imaginum serie exposuit; postea cantico de eadem re proposito scaenas adeo insignis apparauit ut laudum pars maior eis occuparetur, atque opera alia musica magno ingenio et arte ornauit.

uirum uideritis uariis artis generibus exercitatissimum, peritissimum, curiosissimum: nam libro conscripto de arcana quae dicitur scientia, pictoribus Europaeis (quorum opera his DCC annis facta optime cognouit) subsidio esse cameram obscuram quam uocamus ostendit; quam rationem urget tabulis multis quas minute lustretis oblatis. argumentum sic fit plerumque conspectu. hoc, ni fallor, opus omnino non obscurum sed uiri sapientissimi est.